Tónverk 20 / 21 | Tíbrá tónleikaröð

11. maí 2021
19:30
Uppselt

Frumflutningur fjögurra strengjakvartetta

Tónleikar í Sal og í beinu streymi

Frumflutningur fjögurra strengjakvartetta sem samdir eru sérstaklega fyrir Salinn og Strokkvartettinn Sigga.

Salurinn býður í fyrsta sinn upp á tvo valkosti til að upplifa tónleikana. Annars vegar með því að kaupa miða í Salinn og njóta lifandi frumflutningsins í einum besta tónleikasal landsins. Hins vegar með því að kaupa aðgang að beinu streymi af tónleikunum sem hægt er að njóta heima í stofu. Með því að velja "kaupa miða" hnappinn hér að ofan er hægt að velja þann valkost sem hentar miðakaupanda best.


EFNISSKRÁ

Ásbjörg Jónsdóttir (f. 1988)

               Hugleiðing um hlustun, áferð og efni

               Um rekavið úr hafi
               Um grágrýti úr jörðu
               Um greni úr skógi 


Gunnar Karel Másson (f.1984)

               Senza di te


María Huld Markan Sigfúsdóttir (f. 1980)

               Horfnir skógar

               Holað innan
               Milli fjalls og
               Betula
               La forêt


Sigurður Árni Jónsson (f. 1988)

              Mere-Exposure


FLYTJENDUR

Strokkvartettinn Siggi:
Una Sveinbjarnardóttir, fiðla
Helga Þóra Björgvinsdóttir, fiðla
Þórunn Ósk Marínósdóttir, víóla
Sigurður Bjarki Gunnarsson, selló

UM VERKIN

Hugleiðing um hlustun, áferð og efni

Verkið er innblásið af arkitektúr salarins þar sem áhersla er lögð á íslenskan efnivið. Það er rekaviður frá Langanesi utan á byggingunni, grjót úr grunni hússins í gólfinu og greni úr Skorradal á innveggjum. Verkið er unnið út frá áferð, tilfinningu fyrir efninu, uppruna þess og eiginleikum. Ferli eiga sér stað í tónlistinni sem ýmist lýsa úrvinnslu, vinnsluaðferðum eða hversu mikið þau eru meðhöndluð og hver lokaútkoman er.

  • Ásbjörg Jónsdóttir

Senza di te

Snemma í ferlinu ákvað ég að leita að titli sem gæti fangað þá stemmningu sem ég er að leita að í verkinu; Tilfinningin að við séum föst á einhverjum einum stað en samt á ferð.

Sjálfur titillinn, „Senza di te", er fenginn úr ítalskri aríu og þýðir bókstaflega án þín, og eins og titillinn gefur til kynna, fjallar verkið um missi og þrá, sem við öll upplifum í því statíska ferðalagi sem lífið er. Því öll erum við að leita að einhverju sem okkur skortir, einhverju litlu atriði, sem við eltumst við eins og hundur að elta halann á sjálfum sér. Því meira sem við eltumst við það sem okkur skortir, rennur smátt og smátt upp fyrir okkur ljós að við erum enn á sama stað, en samt allt svo breytt. Það sem við þráðum áður er orðið að einhverju öðru, einhverju nýju en samt gömlu.

  • Gunnar Karel Másson

Horfnir skógar

Verkið "Horfnir skógar" er samið útfrá hugleiðingum mínum og rannsóknargrúski um hina ýmsu skóga sem ekki eru lengur til en hafa á einn eða annan hátt markað spor í söguna. Þessar pælingar ná einnig til viðarins í hljóðfærunum sem verkið er leikið á, skóganna sem þau eru smíðuð úr og að sum tré geta orðið ódauðleg í okkar menningarlega samhengi í formi ómetanlegra strengjahljóðfæra. Verkið er í fjórum köflum sem allir vísa með heitum sínum í það skógarumhverfi sem þeir hverfast um. "Holað innan" er tilvísun í steingervinaholur sem finnast á íslandi eftir skóga sem runnu undir hraun fyrir milljónum ára. Milli fjalls og .... vísar til óstnortinna skóga landsins fyrir landnám og Betula er latneska tegundaheiti birkis. La Forêt  er það nafn sem hið mikla eikartréverk innan í þaki Notre Dame var þekkt undir.

  • María Huld Markan Sigfúsdóttir

Mere-Exposure

Mere-Exposure er skýrt eftir hinum svokallaða Mere-exposure effect, sálfræðilegu fyrirbæri sem reynir að útskýra tengsl jákvæðrar upplifunar okkar á hlutum í samræmi við tíðni upplifana á sama hlut. Tenging milli titils og verksins er óbein í besta falli, en grunnhugmyndir verksins voru vangaveltur um áhrif birtu á rými - líkamlega (fýsísku) rými og tilfinningalegu rými. Tónsmíðin er ekki skipulögð að neinu stóru leyti (þrátt fyrir slíkar fyrirætlanir - covid og allt það) en hún leikur sér með ómblíðu og ómstríðu, stöðugleika og óstöðugleika, og skipulagða óreiðu og hvíld, og reynir að hrífa frá víðáttu til þröngs ljósops, og fram og til baka.

  • Sigurður Árni Jónsson

 

TÓNSKÁLDIN

Ásbjörg Jónsdóttir lauk meistaraprófi í tónsmíðum frá Listaháskóla Íslands. Hún hefur breiðan tónlistarlegan bakgrunn, allt frá djasssöng til kórastarfs en hefur þroskað tónsmíðagáfu sína jafnt og þétt í eftirminnilegum kammerverkum sem sameina léttleika og ljóðrænu.

Gunnar Karel Másson lauk meistaraprófi í tónsmíðum frá Tónlistarháskólanum í Kaupmannahöfn en segja má að heimspeki og leikhús eigi ekki minni skerf af honum en tónlistin. Hann hefur tekið þátt í uppsetningu fjölda leiksýninga og samið eða sniðið hljóðheim þeirra. Tónverk hans eru gjarnan eins og leiksvið þar sem hugmyndir takast á.

María Huld Markan Sigfúsdóttir gjörþekkir fiðluna sem flytjandi og hefur í nokkrum tónverkum sínum undanfarið kannað hljóðheim hennar á frumlegan hátt. Hún nam tónsmíðar við Listaháskóla Íslands og hefur mikla reynslu sem tónskáld og flytjandi. Auk kammerverka hennar, sem hafa verið tekin upp og flutt víða um heim hefur hún samið fyrir hljómsveit og tónlist við nokkrar kvikmyndir.

Sigurður Árni Jónsson lauk meistaraprófi bæði í tónsmíðum og hljómsveitarstjórn í Svíþjóð. Hann stjórnar Ensemble Dasein í Gautaborg og hefur rannsakað ýmis blæbrigði kammerskriftar á sannfærandi hátt, en eftir hann liggja jafnframt tvö hljómsveitarverk.

Tónverk 20 / 21  og Tíbrá tónleikaröð er styrkt af Lista- og menningarráði Kópavogsbæjar og unnið í samvinnu við Tónverkamiðstöð Íslands.