Clara | Tíbrá tónleikaröð

08. mars 2022
19:30
Uppselt

Tónleikhúsverk um píanóleikarann og tónskáldið Clöru Schumann

Tónleikhúsverk um píanóleikarann og tónskáldið Clöru Schumann. Lífshlaup og tónlist hennar er í forgrunni auk verka eftir Robert Schumann og Johannes Brahms.

Clara Schumann er ein af þeim örfáu konum sem eiga sér sess í sögu sígildrar vestrænnar tónlistar á 19. öld. Í um 150 ár hefur oftast verið fjallað um hana sem eiginkonu Roberts Schumanns, eins þekktasta tónskálds 19. aldar, og hinn meinta ástarþríhyrning þeirra og Johannesar Brahms, en í tónleikhúsi Cauda Collective og Miðnættis verður saga Clöru sögð út frá hennar sjónarhorni.

 

Clara fæddist í Leipzig, Þýskalandi, þann 13. september árið 1819. Hún hóf píanónám fimm ára og 16 ára var hún orðin þekkt um alla Evrópu fyrir sína snilldar spilamennsku. Þrátt fyrir mótmæli föður síns giftist Clara tónskáldinu Robert Schumann árið 1840 og á árunum 1841 til 1854 eignuðust þau átta börn. Þrátt fyrir að sinna stóru heimili og eiginmanni með geðhvarfasýki hélt Clara áfram starfi sínu sem tónlistarmaður. Hún ferðaðist um og spilaði á tónleikum, kenndi við tónlistarháskólann í Leipzig og samdi eigin tónlist, s.s. píanókonsert, kammermúsík og sönglög. Árið 1853 urðu sterk vinnatengsl á milli Schumann hjónanna og hins unga tónskálds Johannesar Brahms og héldu Clara og Brahms áfram sambandi eftir dauða Roberts Schumanns árið 1856.

 

Í bréfum milli Clöru og Brahms skrifa þau bæði opinskátt um að vera ástfangin hvort að öðru en Clara var alla tíð trú eiginmanni sínum, jafnvel eftir dauða hans.

 

Clara er samstarfsverkefni Caudu Collective og Miðnættis

 

Flytjendur:
Björk Níelsdóttir, sópran
Sigrún Harðardóttir, fiðla
Þórdís Gerður Jónsdóttir, selló
Jane Ade Sutarjo, píanó
Agnes Wild, leikstjórn
Eva Björg Harðardóttir, búningar og leikmynd

 

 

Um flytjendur:

Cauda Collective er tónlistarhópur sem hefur það að markmiði að blanda saman klassískri kammertónlist við nýja tónlist og flétta saman við önnur listform. Hópurinn tekur á sig ýmsa mynd, stækkar og teygir sig í ýmsar áttir, allt eftir verkefnavali hverju sinni. Í starfi hópsins er leitað skapandi leiða til að miðla tónlist og brjóta upp hefðbundna tónleikaformið svo að útkoman verði áhugaverð fyrir áhorfendur og flytjendur, en þó alltaf með það að leiðarljósi að þjóna tónlistinni. Hlutverki tónlistarflytjandans er ögrað, hann semur líka tónlist, útsetur, spinnur og vinnur þvert á miðla.

Handritsgerð er í höndum Cauda Collective og leikstjóra.

Tíbrá tónleikaröð er styrkt af Lista- og menningarráði Kópavogs