Eggert Reginn Kjartansson tenór, Sólveig Steinþórsdóttir fiðluleikari og Þóra Kristín Gunnarsdóttir píanóleikari tengja saman sónötur og sönglög eftir Beethoven og Brahms. Boðskapur tónleikanna er að öll él birtir upp um síðir og þrátt fyrir erfiðleika og áföll heldur lífið
alltaf áfram og allt getur blómstrað á ný.
Í ljóðaflokknum An die ferne Geliebte syngur söngvarinn óð til ástarinnar sinnar, sem er víðs fjarri. Fimmta ljóð flokksins fjallar um vorið sem kemur aftur hjá öllum nema sögumanninum og
ástinni hans sem ekki fá að vera saman. Ljóðaflokkurinn endurspeglar kraft ástarinnar og söngsins sem sameinar hjörtu elskendanna þrátt fyrir að fjarlægðin skilji þau að. Vorsónatan
fyrir fiðlu og píanó fylgir svo í kjölfarið í efnisskránni, en vorið og náttúran í tónlistinni tengir þessi tvö verk saman.
Sónata Brahms í G-dúr er oft kölluð Regnsónatan, en ástæða þess er sú að Brahms byggði lokakafla hennar á sönglögum sínum, Regenlied og Nachklang. Fyrra ljóðið kallar fram
fortíðarþrá, löngunina til hverfa aftur til einfaldari tíma. Seinna ljóðið er huggunarljóð og regnið verður táknmynd erfiðleika en um leið nýs upphafs, því að eftir regnið mun sólin snúa aftur og grasið verður grænna en nokkru sinni fyrr.
Efnisskrá:
Ludwig van Beethoven
An die ferne Geliebte op. 98
Sónata nr. 5 í F-dúr fyrir píanó og fiðlu, op. 24 (Vorsónatan)
Johannes Brahms
Úr lagaflokki op. 59
Regenlied
Nachklang
Mein wundes Herz verlangt nach milder Ruh
Dein blaues Auge hält so still
Sónata nr. 1 í G-dúr fyrir píanó og fiðlu, op. 78
Tónleikarnir eru í samstarfi við Salinn í Kópavogi og styrktir af Tónlistarsjóði.
