17.sep 13:00 – 14:00

Bernsku-Brek

Þjóðlagaskotnir fjölskyldutónleikar fyrir hressa og skapandi krakka á öllum aldri. Efnisskráin var unnin fyrir Big Bang tónlistarhátíðina í Hörpu fyrr á þessu ári þar sem Brek hélt tónleika fyrir hundruð grunnskólabarna.

Hljómsveitin Brek hefur vakið mikla athygli á undanförnum árum fyrir grípandi lagasmíðar og vandaða söngtexta. Brek spilar akústíska tónlist og sækir áhrif víða að, m.a. úr íslenskum þjóðlagaarfi, skandínavískri og bandarískri tónlist, jazzi og fleiru.  

Hér býður sveitin upp á nærandi og metnaðarfullar tónlistarupplifun fyrir börn og fjölskyldur þeirra þar sem saman renna minningabrot, frásagnir, hljóðmyndir og dásamleg tónlist í framúrskarandi flutningi. Með liðsinni áhorfenda verður til heillandi stemning þar sem hlustað er eftir óvæntum hljóðum, takti og laglínum.  

Brek hlaut Íslensku tónlistarverðlaunin 2022 fyrir plötu ársins í þjóðlaga- og heimstónlist. Sveitina skipa þau Harpa Þorvaldsdóttir, söngur og píanó, Jóhann Ingi Benediktsson, söngur og gítar, Guðmundur Atli Pétursson, mandólín og bakraddir og Sigmar Þór Matthíasson, kontrabassi og bakraddir. Belgíski leikstjórinn Wouter Van Looy, listrænn stjórnandi Big Bang Festival vann og þróaði sviðshreyfingar tónleikanna í samstarfi við hópinn.  

Fjölskyldustundir á laugardögum eru í boði lista- og menningarráðs Kópavogs. Viðburðirnir fara fram vikulega kl. 13 til skiptis í Salnum, Gerðarsafni, Bókasafni Kópavogs og Náttúrufræðistofu.
Alltaf ókeypis og öll velkomin!

UPPHITUN

Horfðu og hlustaðu

Deildu þessum viðburði

ÞÚ GÆTIR HAFT ÁHUGA Á

Sjá meira