Komdu með hinni frægu kú, Búkollu, í töfrandi ferðalag fyrir börn á aldrinum 2–6 ára. Gleðin og litirnir í heiminum hafa horfið og aðeins norðurljósin geta náð í þá aftur til baka.
Í þessari skynrænu og tónrænu sýningu leggur Búkolla upp í ferð um villt landslag náttúrunnar. Á leiðinni mætir hún bæði áskorunum og undraverum – en með opnum eyrum, stóru hjarta og hugrekki til að hlusta á raddir náttúrunnar (og sína eigin) finnur hún leiðina áfram.
Svafa Þórhallsdóttir, söngkona og tónskáld, flytur.
Fjölskyldustundir menningarhúsanna fara fram á laugardögum frá klukkan 13, á víxl á Bókasafni Kópavogs (aðalsafni og Lindasafni), Gerðarsafni, Salnum eða Náttúrufræðistofu Kópavogs. Þátttaka er ókeypis og öll velkomin á meðan húsrúm leyfir.
