20. jún 21:00 – 22:30

Davíð Þór Jónsson og Eyþór Gunnarsson

Flyglaflug á Jónsmessu

Síðkvöldstónleikar á sumarsólstöðum með tveimur af fremstu tónlistarmönnum landsins. Davíð Þór Jónsson og Eyþór Gunnarsson hafa áður tekið höndum saman í óbeisluðu spunaflugi við frábærar undirtektir. Hér leika þeir á tvo flygla Salarins á bjartasta degi ársins. Ekki missa af þessu undurfallega óvissuferðalagi.

Dav­íð Þór er með­al fjöl­hæf­ustu tón­list­ar­manna lands­ins, jafn­víg­ur á pí­anó­leik, spuna, tón­smíð­ar og hljóm­sveit­ar­stjórn auk þess sem hann leik­ur á ógrynni hljóð­færa. Hann hef­ur leik­ið með flest­um tón­list­ar­mönn­um lands­ins og spil­að á tón­list­ar­há­tíð­um um all­an heim.

Dav­íð Þór hef­ur gert tónlist og hljóð­mynd­ir fyr­ir fjölda leik­sýn­inga. Hann hef­ur einnig tón­sett út­varps­leik­rit og sjón­varps­verk af ýmsu tagi auk þess að semja tónlist fyr­ir dans­verk.. Hann hef­ur einnig unn­ið náið með sviðslista­fólki og mynd­list­ar­mönn­um og mætti þar helst nefna Ragn­ar Kjart­ans­son, en sam­an hafa þeir skapað þrjú tón­list­ar- og mynd­bands­verk:­ Guð (Sorgin sigrar hamingjuna) frá 2007; The End, fram­lag Ís­lands á Fen­eyj­art­víær­ingn­um árið 2009 og Visitors frá 2012. Davíð Þór samdi tónlist við kvikmyndir Benedikts Erlingssonar, Hross í oss og Kona fer í stríð en fyrir þá tónlist hefur hann hlotið fjölda verðlauna, má þar nefna Norrænu kvikmyndatónlistarverðlaunin og Aubagne-verðlaunin.

Eyþór Gunnarsson er einn atkvæðamesti tónlistarmaður Íslands. Hann hefur átt langt og farsælt samstarf við ógrynni tónlistarmanna úr flestum geirum tónlistar og er margverðlaunaður fyrir hljómborðs- og píanóleik sinn.Á meðal ótal tónlistarmanna og hljómsveita sem Eyþór hefur starfað með í gegnum tíðina má nefna Ellenu Kristjánsdóttur og KK band, Gunnar Þórðarson og Bubba Mortens, Borgardætur og Baggalút, Ladda, Ragga Bjarna, Ríó Tríó, Rússíbana og fleiri og fleiri en Eyþór hefur spilað inn á vel á annað hundruð íslenskar hljómplötur og hefur einnig átt samstarf við fjölmarga erlenda tónlistarmenn og spilað á tónleikum um allan heim.

Á undanförnum árum hefur Eyþór í æ ríkara mæli einbeitt sér að djasspíanóleik og spilað með ótal djasstónlistarmönnum, þeirra á meðal Jóel Pálssyni, Óskari Guðjónssyni, Sigurði Flosasyni, Tómasi R. Einarssyni, Ara Braga Kárasyni, Davíð Þór Jónssyni og fleirum. 

Það var á Djasshátíð Reykjavíkur árið 2009 sem þeir Davíð Þór Jónsson og Eyþór Gunnarsson opinberuðu sitt samspil – sína tvíflygni – sem hafði fram að því að mestu farið fram fyrir luktum dyrum.

Til stóð að nokkrir íslenskir píanistar flyttu stuttar einleiksdagskrár í Norræna húsinu. Allir tóku vel í hugmyndina þegar til þeirra var leitað. Davíð Þór hringdi skömmu eftir að þetta var fastmælum bundið og tilkynnti að þeir Eyþór ætluðu að spila dúett. Djassdagskrárstjórinn fór beint í úrtöluhaminn og benti á að aðeins væri einn flygill i Norræna húsinu. “Haf þú engar áhyggjur af því” var svarið.

Þannig hófst það sem hefur verið likt við “impressjónískt ferðalag hrekkjóttra engla” (V. Linnet MBL 2009) og “óvissuferð á sjóskíðum aftan í stjórnlausum hraðbáti” (E.G. RÚV 2023). Tvíleikur Eyþórs og Davíðs er oft lyginni líkastur. En hann er líka alltaf sannur. Farangurinn skilinn eftir frammi. Strípað músíkalitet slaghörpuleikaranna einu spjarirnar. Í hverju ætli þeir verði?

Pétur Grétarsson

FRAM KOMA

Deildu þessum viðburði

Sjá meira

ÞÚ GÆTIR HAFT ÁHUGA Á

Sjá meira