Guðrún Jóhanna Ólafsdóttir mezzósópran hefur sungið vítt og breitt um Evrópu, í Bandaríkjunum og Suður-Ameríku, hlotið verðlaun og sungið inn á fjölda geisladiska. Fyrir hlé flytur hún, ásamt spænska klassíska gítarleikaranum Francisco Javier Jáuregui, útsetningar fyrir rödd og gítar á sönglögunum Klementínudans, Kisa mín og Úr Hulduljóðum (Smávinir fagrir) eftir Atla Heimi Sveinsson. Þau kynna einnig áhorfendum á höfuðborgarsvæðinu í fyrsta skipti nýjar útsetningar á bandarískum þjóðlögum sem John Jacob Niles gerði fræg á síðustu öld. Helmingnum lýkur með ástsælli þýðingu Þórarins Eldjárns á lagi Violetu Parra, Þökk sé þessu lífi (Gracias a la vida). Eftir hlé flétta þau Guðrún og píanóleikarinn Sigurður Helgi Oddsson saman ýmsum lögum sem innblásin eru af habanera taktinum margfræga. Má þar nefna Havanaise eftir Pauline Viardot, Youkali eftir Kurt Weill, Vocalise-étude en forme de Habanera eftir Maurice Ravel, Kúbu-innblásin sönglög eftir Xavier Montsalvatge og að sjálfsögðu hina frægu Habaneru aríu Carmenar úr samnefndri óperu eftir Georges Bizet.
Syngjandi í Salnum er ný tónleikaröð sem hóf göngu sína í Salnum í Kópavogi í febrúar 2022. Listrænn stjórnandi hennar er Guðrún Jóhanna Ólafsdóttir söngkona. Í röðinni er boðið upp á söngtónleika með nokkrum af fremstu klassísku söngvurum Íslands. Hverjir tónleikar verða nokkurs konar ,,portrett“ tónleikar, sem gefa mynd af listamanninum. Á blandaðri efnisskránni er undirstöðuefnið oft íslenskur og erlendur ljóðasöngur ásamt óperuaríum. Tónleikaröðin býður upp á sjö tónleika yfir tónleikaárið 2022-2023.
