Hin lífsseiga spjalltónleikaröð Jóns Ólafssonar, Af fingrum fram, heldur ótrauð áfram inn í sextánda starfsvetur sinn í Salnum.
Krúner – og kalypsókóngurinn sjálfur, Bogomil Font, verður í slagtogi með Sigtryggi á þessum tónleikum og morgunljóst að eitthvað verður dillað sér í þægilegum sætum Salarins. Sigtryggur Baldursson á glæstan feril að baki sem trymbill í hljómsveitum eins og Þeyr, Kukl og Sykurmolunum og stökk svo fullskapaður dægurlagasöngvari með Hljómsveit Konráðs Bé áður en hann stofnaði Milljónamæringana sem sérhæfir sig í suðuramerískri tónlist. Það verður því í mörg horn að líta þegar þessi frábæri sagnamaður og einstaka séntilmenni verður tekinn á beinið af annars geðþekkum gestgjafanum, Jóni Ólafssyni.
